मुंबई महापालिकेच्या निवडणुकांच्या घोषणेनंतर राजकीय वातावरण तापले असून, यंदाच्या निवडणुकीत महिलांचा सहभाग मोठ्या प्रमाणात वाढताना दिसत आहे. विशेषतः महायुतीकडून राबवण्यात आलेल्या ‘लाडकी बहीण’ योजनेमुळे महिला मतदारांबरोबरच महिला उमेदवारांमध्येही उत्साहाचे वातावरण निर्माण झाले आहे.
शिंदे गटाच्या शिवसेनेकडून महापालिका निवडणूक लढवण्यासाठी इच्छुक उमेदवारांच्या मुलाखती घेण्यात आल्या. मुंबईतील २२७ वॉर्डसाठी तब्बल २४०० हून अधिक इच्छुकांनी मुलाखती दिल्याची माहिती पक्षातील नेत्यांनी दिली. यामध्ये महिला इच्छुकांची संख्या लक्षणीय असून, शिवसेनेत महिला उमेदवारांची विक्रमी गर्दी पाहायला मिळाली.
पक्षाने मुंबईतील प्रत्येक लोकसभा मतदारसंघासाठी निरीक्षकांची नियुक्ती करून उमेदवार निवडीची प्रक्रिया पारदर्शकपणे राबवली. रंगशारदा येथे आयोजित मुलाखत कार्यक्रमाला प्रचंड प्रतिसाद मिळाला असून, अन्य पक्षांच्या तुलनेत शिवसेनेला सर्वाधिक इच्छुकांचा प्रतिसाद लाभल्याचे पक्षनेत्यांनी सांगितले.
शिवसेनेच्या नेत्यांच्या मते, गेल्या अडीच वर्षांत एकनाथ शिंदे यांनी मुख्यमंत्रीपदाच्या काळात राज्य आणि मुंबईत केलेल्या विकासकामांचा सकारात्मक परिणाम जनतेवर झाला आहे. त्याचाच परिपाक म्हणून शिवसेनेला महापालिका निवडणुकीत मोठा प्रतिसाद मिळत असून, पक्षाला विजयाचा विश्वास असल्याचेही त्यांनी स्पष्ट केले.
By
