कोल्हापूर जिल्ह्यातील दहा नगरपरिषद व नगरपंचायतींच्या निवडणुकांचे निकाल येत्या रविवारी, २१ डिसेंबर रोजी जाहीर होणार असून नागरिकांचे लक्ष या निकालांकडे लागले आहे. विविध ठिकाणी मतमोजणीची तयारी अंतिम टप्प्यात असून प्रशासन पूर्णपणे सज्ज असल्याची माहिती देण्यात आली आहे.
गडहिंग्लज नगरपरिषद क्षेत्रातील प्रभाग क्रमांक ३ ‘अ’ साठी शनिवारी मतदान होणार आहे. या ठिकाणी २,४७९ मतदारांसाठी तीन मतदान केंद्रांवर मतदानाची व्यवस्था करण्यात आली आहे.
जिल्हाधिकारी अमोल येडगे यांनी मतमोजणी केंद्रांवरील नियोजनाबाबत स्पष्ट सूचना दिल्या आहेत. निकालानंतर कोणत्याही प्रकारच्या विजय मिरवणुका, रॅली किंवा गर्दीला परवानगी दिली जाणार नसून कायदा व सुव्यवस्था काटेकोरपणे राखण्याचे आदेश देण्यात आले आहेत. तसेच सर्व ईव्हीएम आणि स्ट्राँग रूमच्या सुरक्षेबाबत विशेष दक्षता घेण्याचे निर्देश देण्यात आले आहेत.
पोलीस अधीक्षक योगेशकुमार गुप्ता यांनी प्रतिबंधात्मक कारवाई, तडीपार आदेश, समन्स आणि प्रलंबित गुन्ह्यांबाबतची माहिती दिली. कोल्हापूर आणि इचलकरंजी येथील नियंत्रण कक्षांद्वारे संपूर्ण जिल्ह्यातील परिस्थितीवर लक्ष ठेवण्यात येत असल्याचे त्यांनी स्पष्ट केले.
जिल्ह्यातील १३ स्ट्राँग रूम ठिकाणी सशस्त्र दलाचे जवान आणि आर्मगार्ड तैनात करण्यात आले आहेत. बंदोबस्तासाठी ८ पोलीस उपविभागीय अधिकारी, १२ पोलीस निरीक्षक, ५५ सहाय्यक पोलीस निरीक्षक, ४६३ पोलीस कर्मचारी आणि सुमारे ८०० होमगार्डची नियुक्ती करण्यात आली आहे.
हेही वाचा
By
