राज्यातील आगामी महापालिका निवडणुकांच्या पार्श्वभूमीवर राजकीय घडामोडींना वेग आला आहे. पुणे आणि पिंपरी चिंचवडमध्ये राष्ट्रवादी काँग्रेसचे दोन्ही गट एकत्र येणार का, यावर सध्या जोरदार चर्चा सुरू आहे. अजित पवार यांच्या नेतृत्वाखालील राष्ट्रवादी काँग्रेसने स्वतंत्रपणे निवडणूक लढवण्याची तयारी जवळपास पूर्ण केली असून, मुंबईत किमान ५० जागांवर पक्ष सज्ज असल्याची माहिती आहे.
दरम्यान, पिंपरी चिंचवड महापालिका निवडणुकीसाठी शरद पवार गटाचे शहराध्यक्ष तुषार कामठे यांनी अजित पवार यांची भेट घेतल्याने राजकीय वर्तुळात उत्सुकता निर्माण झाली आहे. दोघांमध्ये बंद दाराआड चर्चा झाल्याचे समजते. या भेटीनंतर पिंपरी चिंचवडमधील अनेक इच्छुकांनी अजित पवार गटात प्रवेश केल्याची माहिती समोर आली आहे.
महापालिका निवडणुका स्थानिक पातळीवर एकत्र लढाव्यात, असा प्रस्ताव तुषार कामठे यांनी अजित पवार यांच्यासमोर मांडल्याचे सांगितले जाते. भाजपविरोधी विचारांच्या पक्षांना एकत्र घेऊन निवडणूक लढवावी, अशी भूमिका त्यांनी स्पष्ट केली. स्थानिक नेत्यांना निर्णय घेण्याचे स्वातंत्र्य देण्यात आले असल्याचेही त्यांनी नमूद केले.
या भेटीनंतर बोलताना तुषार कामठे म्हणाले की, “महानगरपालिका निवडणूक एकत्र लढल्यास भाजपला रोखता येऊ शकते. हा प्रस्ताव मी वैयक्तिकरित्या मांडला असून कोणताही अधिकृत संदेश घेऊन आलो नव्हतो. दादांनी थोडक्यात चर्चा केली, मात्र त्यांनी ऐकून घेतले.”
दरम्यान, पुण्यातील दीर्घ बैठका आटोपून अजित पवार मुंबईकडे रवाना झाले आहेत. त्यामुळे पिंपरी चिंचवडसह पुणे महापालिकेसाठी अजित पवार नेमकी कोणती भूमिका घेतात, याकडे सर्वांचे लक्ष लागले आहे.
By
